Era doveroso che Sciacca si ricordasse…


Ieri è stata inaugurato il monumento al Poeta Vincenzo Licata

E’ bello quando Sciacca si ricorda dei suoi Figli migliori!



SCIACCA

ai miei concittadini lontani

T’amu pirchì si bedda, Sciacca mia,

pi ssa luci chi manna lu to’ mari.

pirchì mi rigalasti la puisia

ccu lu travaghiu di sti marinari.

T’amu, pirchì mi basta ssu tramuntu

pi farimi ‘n-artista divintari,

pirchì lu to’ passatu è com’un cuntu

d’omini illustri e di ricordi cari.

T’amu pi la to’ genti rispittusa

ch’avi l’anima sempri arrifriscata

di sta nostra marina purtintusa

sempri d’un suli d’oru illuminata.

A guardariti anticchia di stu mari

pari chi scinni Tu di la vaddata

pirchì tuttu st’azzurru vo’ abbrazzari

pi daricci, di cori, na vasata.

T’amu pirchì lu “munti” toi nfatatu

ti fa curuna, o terra mia divina,

Lu “munti”, dunni vighia ‘n-granni fatu

natu e crisciutu dintra sta marina.

T’amu pi li carizzi chi m’hai datu

quannu, nicuzzu, ntra li to’ vaneddi,

lassavi lu me’ côri spinsiratu

e la nnuccenza di sti vavareddi.

Si quarchi vota Tu mi sì cuntraria

pirchì di certi cosi nun t’adduni,

ssi to’… tintizzi mannu tutti all’aria

pi sti versi amurusi chi mi duni.

Pirchì davanti a Tia mi sentu nicu

comu nicu mi sentu ccu la mamma.

Sciacca, paisi beddu, eterna fiamma,

ti salutu, t’abbrazzu e binidicu.



Vincenzo Licata